Mèsi mayestwo Aladin…

PASSEPORT MAGAZINE

Otè: Christien SYLVAINCE

Mèsi mayestwo Aladin…

Pipo depi w travèse a, li pa janm jou
Kowona te enpoze m di w mèsi
Elize pa t ka travèse Matisan
Pou l te vin di w yon dènye orevwa
Pè Julien pa t ka prezan pou li te ba ou yon dènye sakreman

Pandan mayestwo Eric Moraille ap travèse
M ap voye di ou mèsi pou sa w te ye pou mwen
Mèsi pou ideyoloji sa ou te pataje avèk mwen an si bemòl
Mèsi paske ou te moutre m travèse kalfou lavi
M ap fè w konnen Aprè Dye tonbe

Pipo yo asasine Aprè Dye
Yo pete je l
Yo kase ponyèt li
Yo kase 2 pye l
Yo gaye sèvè l li 7 jiyè

Pipo depi lè w ale a, li vin pi fè nwa
Yo kidnape Ayiti
Dominiken pa pran nou menm pou pip tabak
Papa manke Prezidan 2 fwa men Babekyou bare l, malgre zanmitay 25 lane ak Tonton Sam
Pipo si ou te la se 2500 goud ou t ap achte yon galon gaz

Ay fout! Foote kanpe an kwa
Tankou bawon lakwa
Pipo G9 moute barikad yo jou envestiti a, bal tonbe tankou lapli
Papa pèdi tout lespwa prezidansyèl
Anba je ti rès sena

Mayestwo Eric Moraille tanpri pran san w pou w bay nouvèl yo
Pipo, katouch tounen lapli nan Matisan
Pipo, li enposib pou yon moun manje Babekyou nan Delma
Pipo enpinite ap mache toutouni nan peyi Dayiti
Pipo van enserite tèlman soufle fò, li pote ale Netty ak Diégo Charles, pou m site sila yo sèlman

Pipo mwen konnen w ap kontan wè mayestwo Eric
Mwen konnen, ou menm ak Jacques, Lamarre, Jacques Civil ak Hector Lominy pral byen jwe anlè a
Pipo mwen te bliye voye di ou, depi lè Aprè Dye tonbe a, nou san prezidan
Pipo pèp Ayisyen an ap moute yon kwa devan dèyè
Mayestwo Eric, sonje di Pipo fè nwa klere kou solèy midi, menm kadav tounen adrès nan peyi Dayiti.

Spread the love

Laisser un commentaire

Votre adresse e-mail ne sera pas publiée.